امثال فلسطينيه

أمثال فلسطينية

إذا انت أمير و أنا أمير ، مين بيسوك الحمير ؟
عاشر المصلي بتصلي و عاشر المغني بتغني
بكره بنكعد عالحيطة وبنسمع الزيطة
لو كان الزلام بشواربهم لكان الصرصور أزلمهم
صار للشرشوحة مرجوحة و لأبو بريص كبكاب
الإبن الوسخ بجيب لأهله المسبه
إذا كولنالها اطبخي بتكول مريضه
بس اذا كولنالها تعي كلي بتكول وين معلكتي العريضة ؟
الطول طول نخلة والعكل عكل سخلة
اللي بدري بدري واللي ما بدري بيكول كف عدس
كوم حجار ولا هالجار
ضلك ورا العيار ( الكذاب ) لباب الدار
ين بشهد للعروس ؟..إمها و خالتها و عشره من حارتها
لولاكي يا جارتي لفكعت مرارتي!
ما حد بكول عن زيته عكر
يوم إلك ويوم عليك، دير بالك فتح عينيك !
سمره ونغشه؟ ولا بيضة ودفشة!
الجوز رحمة ولو كان فحمة
عندك عيش وعندي عيش، وفراغة العين ليش؟
ريحة الإم بتلم
أخذتك شطر بطر يا سنسونة روحي ، جيت أكيد العدى كدت أنا روحي!
إبنك على ما تربيه و جوزك على ما تعوديه
يا جاي بلا عزيمة يا كليل الكيمة
ضحكة عنزة ع باب مسلخ

الله يعطيك العافيه
بس بتعرفو يا جماعه انو في بعض المسلسلات لما يعملوها باللهجة الفلسطسنيه ما بتكون مزبوطه وببينونا انو حكينا مو مفهوم
بس مبارده لطيفه وشكرا

هههههههههههههههههههه جد من الآآآآآخر صحيح بضحكو بس ليش الحكي معهم حق بكل شي وبتيجي دايما عالوجع وبالصراحة اكتر انا بحكي منهم كتير هههههههههه

شكرآ على مرورك
بس اسمها يا اخت مباردة مو مبارده لأني مو بارد هع هع
شكرآ

غلطه مطبعيه مرقلي ياها عشان الي ما تصير معك
فبمرقلك ياها(تبادل خدمات)
وانا اكيد مو قصدي انك بارد بس غلطه لاتحملها كتير

هههههههههههه هني حلوين كتير بس الي ملاحظة لو سمحت

هاي الامتال بتبادلوها كل بلاد الشام يعني فلسطين +سوريا+الاردن+لبنان

مظبوط اخ عاشق فلسطين